Bpk Azmi Dt. Bagindo, Bpk. Epy Buchari, Bpk. St.Lembang Alam, Dinda Nofend (Buya Masoed kama lah kini ko?), sarato dunsanak sakalian,
Batua nan dikatokan dek Bapak Azmi, makna pantun Minang ko dapek disasuaikan jo situasi bilo dan dalam suasana baa inyo diucapkan. Di situlah kehebatannyo; itulah nan ambo sabuik sifat polisemi pantun Minang ko.
Memang dulu pantun ko buah kato. Sarancak sagagah ko awak, indak bapantun agak sabuah indak kameh badan rasonyo. Baitu bana dulu. Urang nan pandai basilek lidah pasti pinta mangarang pantun. Maluncua sajo pantun nan panuah ibaraik jo kato melereang dari muluiknyo, Pasambahan jo pantun bapilin2 tumah, bantuak tali gasiang. Tabayang dek ambo wakatu ketek di kampuang: takaagum2 ambo maliek urang tuo2 basilek kato sabalum maurak jamba.
Mambaco transliterasi pantun2 nenek muyang kito nan tasimpan di nagari urang ko, tagalak2 surang ambo, sudah tu tarumuak surang, tabayang lereng Singgalang jo Marapi. Ko sajamang lai, koleksi Van Ophuijsen dkk.tun:
428
Batang sago di hulu rumin,
Ambiak sakarek jalimuiknyo,
Kok santanomanjadi angin,
Masuak ka dalam salimuiknyo.
429
Pucuak katela, pisang hutan,
Ureknyo dikakeh balam,
Allah Taala Tolan bukan,
Takana juo siang-malam.
(I love this pantun; Suryadi. Takana dek ambo maso mudo; Buya joPak Azmi pasti takana pulo dek baliau wakatu mudo dulu mah he he)
430
Anak gagak di Pulau Anso,
Mangakeh mancari makan,
Malempah minyak dalam kaco,
Riaknyo tidak kalihatan.
(pantun ini dalam sekali maknanya; Suryadi)
438
Basikek duduak di pintu,
Rambuik tajelo ka halaman,
Bari tarang Kualo Tiku,
Mukasuik nak lalu ka Pariaman.
441
Barabab batali tujuah,
Bagandang lalu ka tapian,
Sababnyo mumbang tidak tumbuah,
Dirandang paneh tujuah bulan.
447
Lapeh nan dari Pulau Pandan,
Andak manjalang Gosong Limo,
Sanggua nan ranjuang lipek pandan,
Lawan e deta saluak timbo.
(ahaimati badan den!; Suryadi)
464
Batiak cimangko tangah padang,
Masak baparam dalam paneh,
Itiak jo anso nan baranang,
Manga kokayam mati lameh?
1500
Sia tagak sia manari,
Doro-badoro lantai papan,
Ungko patah siamang mati
Maambiak buah manggih hutan.
1511
Ayam putiah tabang ka lambah,
Tibo di lambah makan padi,
Kapa upiah pangayuah bilah,
Maksuik juo ka Batawi.
1512.
Kapa parang kapa Ulando,
Kapa Parancih muek garam,
Jangan ditompang biduak ambo,
Kapa tirih mananti karam.
1513.
Hari paneh mananam tubo,
Tanam sagagang di halaman,
Biduak ameh layia kasumbo,
Mintak manompangambo sinan.
Alah tu dulu. Kok dipaturuikan sansai badan ambo dek e. Makin dibaco koleksi pantun lamo warisan nenek muyang kito o, ko makin maramang bulu kuduak dek e.
Wassalam,
sumber:
Tulisan ini menanggapi postingan Sedikit tentang Estetika Pantun Minang di Mailing List Minang terbesar, http://groups.google.com/group/RantauNet.
0 Comments
EmoticonEmoticon